Archive for 'Հայերեն հոդվածներ'

Ֆիլհարմոնիկի «Ռիգոլետոն»՝ ռեժիսորի պատրաստած խամաճիկներով

November 18th, 2016
by
under Հայերեն հոդվածներ.
No Comments.

Օրերս Էդուարդ Թոփչյանի ղեկավարությամբ Հայաստանի ազգային ֆիլհարմոնիկ նվագախումբը Սուքիաս Թորոսյանի ռեժիսուրայով կրկին անդրադարձավ Վերդիի «Ռիգոլետո» օպերային, այս անգամ՝ համերգային թատերականացված ներկայացմամբ: Հիշեցնենք, որ 2009թ. այս օպերան ներկայացվել է Ազգային օպերային թատրոնում: Համերգային թատերականացված ներկայացմանը մասնակցեցին Հովհաննես Չեքիջյանի ղեկավարած Հայաստանի ազգային ակադեմիական երգչախմբի արական կազմը, տենոր Լիպարիտ Ավետիսյանը (Հերցոգ), սոպրանո Հասմիկ Թորոսյանը (Ջիլդա), բաս Սուրեն Շահիջանյանը (Սպարաֆուչիլե), մեցցո սոպրանո Նարինե Անանիկյանը (Մադալենա), մեցցո սոպրանո Մարիամ Ալոյանը (Ջովաննա), բաս Ռիչարդ Մադլենյանը (Մոնտերոն), բարիտոն Գագիկ Վարդանյանը (Մարուլլո), բաս Պողոս Բիազբեկյանը (Չեպրանո), սոպրանո Սիլվա Պետրոսյանը (Կոմսուհի): Ռիգոլետտոյի դերերգով առաջին անգամ հայ հանդիսատեսին ներկայացավ իտալացի բարիտոն Ջանպիերո Ռուջերին: Իտալացի երգչին, որը «Առավոտի» հետ զրույցում ասաց, թե չի հիշում որերորդ անգամ է հանդես գալիս Ռիգոլետոյի դերերգով, ներկայացնելու հարկ չկա, թեկուզ հենց այն պատճառով, որ նա իտալացի է ու կատարում է համերկրացու ստեղծագործությունը: Ընդ որում, օպերային թատրոնի մեներգիչներին էլ, որոնք հրավիրված էին այլ դերերգերի կատարման համար, նույնպես չենք ներկայացնի, նրանք քաջածանոթ են մեր հանդիսատեսին: Վերջինս հիանալի է ճանաչում նաեւ ֆրանսաբնակ Սուրեն Շահիջանյանին: Իսկ համերգային թատերականացված ներկայացման մասին համառոտ խոսելն անհրաժեշտ է: Ռիգոլետո՝ Ջանպիերո Ռուջերի:   Լիպարիտ Ավետիսյանը՝ Հերցոգ եւ Հասմիկ Թորոսյանը՝ Ջիլդա: Ռեժիսոր Սուքիաս Թորոսյանը, որը ֆիլհարմոնիկի հետ ժամանակին իրականացրել է համաշխարհային օպերային գրականության այլ գանձերից նույնպես, այս անգամ յուրատեսակ լուծում էր գտել: Ներկայացման հերոսները ներկայանում էին իրենց կերպարը բնութագրող խամաճիկներով, որոնք, պարզվեց, հենց ռեժիսորի ստեղծածն են: Մեկ կարեւոր հանգամանք եւս. ողջ ներկայացման ընթացքը միաժամանակ ցուցադրվում էր էկրանին: Ինչու ենք սա կարեւորում: Որովհետեւ ամֆիթատրոնում, աջ ու ձախ օթյակներում եւ թատերահարթակում գտնվող հանդիսատեսը էկրանի միջոցով հետևում էր նաեւ ցանկացած մանրուքի՝ սկսած հենց մեներգիչների դիմախաղից: Իր նվագախմբով շուրջ 15 տարի եւ ուղիղ 15 տարբեր օպերաներ ղեկավարած դիրիժոր Էդուարդ Թոփչյանը, բնականաբար, իր տարերքի մեջ էր: Նա «ընկել» էր դրամատիզմով, վառ կոնտրաստներով եւ հոգեբանական խոր ապրումներով Վերդիի երաժշտության գիրկը: Օպերասեր դիրիժորին հարց ուղղեցինք՝ արտասահմանում ի՞նչ օպերաներ է ղեկավարել: «Շատ…«Դոն Ժուան», «Պիկովայա Դամա», «Կախարդական սրինգը», «Տուրանդոտ», «Տոսկա» եւ այլն»,-նշեց դիրիժորը: Հավելեց նաեւ, թե այժմ բարիդրացիական- ստեղծագործական հիանալի հարաբերություններ է հաստատել օպերային թատրոնի տնօրենի եւ մշակույթի նորանշանակ նախարարի հետ, ինչից կարելի է ակնկալել, որ այսուհետ ֆիլհարմոնիկի օպերային նախագծերը կբեմադրվեն թատրոնում: Իսկ Ազգային օպերային թատրոնում «Ռիգոլետոն» առաջին անգամ բեմադրվել է 1937թ., բեմադրող դիրիժոր՝ Մ. Թավրիզյան, բեմադրող ռեժիսոր՝ Ի. Վոլչեկ: Վերդիի 28 օպերաներից մեր թատրոնի գործունեության ընթացքում բեմադրվել է 7-ը: Այսօր խաղացանկում են «Աիդան», «Տրուբադուրը», «Տրավիատան»: Ռեժիսոր Սուքիաս Թորոսյանը: Դիրիժոր Էդուարդ Թոփչյանը մեներգիչների հետ: 2013թ., երբ աշխարհը նշում էր Վերդիի ծննդյան 200-ամյակը, Կոմիտասի անվան պետական կոնսերվատորիայի վոկալ ամբիոնի պրոֆեսոր, երջանկահիշատակ Ռաֆայել Հակոբյանցը գործընկերների եւ ուսանողների ուժերով անցկացրեց «Վերդիանա» փառատոն, որի ընթացքում հնչեցին մեներգեր, դուետներ Վերդիի՝ ոչ միայն մեզ հայտնի օպերաներից, այլեւ այնպիսի գործերից, որոնք աշխարհում էլ քիչ են բեմադրվում, այդ թվում՝ «Էռնանի», «Լուիզա Միլեր», «Ֆալստաֆ»: Ընդ որում, Ռ. Հակոբյանցի մտահղացմամբ մեր օպերային թատրոնում 1988թ.՝ Վերդիի ծննդյան 175-ամյակի առիթով ներկայացվել էր «Վերդիանա» թատերականացված գալա համերգը, ներառված կոմպոզիտորի 14 օպերաներից:

VN:F [1.9.20_1166]
Rating: 5.0/5 (1 vote cast)
VN:F [1.9.20_1166]
Rating: 0 (from 0 votes)

spacer

Երևանյան փառատոնի անունը ճանաչելի է ամբողջ աշխարհում

September 13th, 2016
by
under Հայերեն հոդվածներ.
No Comments.

«Արամ Խաչատրյան» համերգասրահում այսօր կմենարկի տարվա գլխավոր երաժշտական իրադարձություններից մեկը՝ Երևանյան միջազգային երաժշտական փառատոնը: Սեպտեմբերի 10-ից մինչև հոկտեմբերի 30-ը Հայաստանի Ազգային ֆիլհարմոնիկ նվագախումբը հայաստանցի երաժշստասերներին կներկայացնի դասական երաժշտության լավագույն ստեղծագործությունները ժամանակի ամենահայտնի կատարողների մասնակցությամբ: Այսօր լրագրողների հետ հանդիպման ժամանակ ՀԱՖՆ գլխավոր դիրիժոր և գեղարվեստական ղեկավար Էդուարդ Թոփչյանը նշեց, որ 10-րդ հոբելյանական փառատոնի առանձնահատկությունը հանրահայտ դիրիժորների ներկայությունն է. «Այս տարի մեզ հաջողվել է հրավիրել միանգամից մի քանի դիրիժորների: Նման բան նախկինում չէր հաջողվում անել: Երևան կժամանի Վասիլի Սինայսկին, որը ամենահանրահայտ դիրիժորներից մեկն է: Հաջորդ համերգը կղեկավարի Կիրիլ Կարաբից, որը թեև երիտասարդ սերնդի ներկայացուցիչ է, սակայն արդեն մեծ ձեռբերումներ ունի»,- ասաց դիրիժորը: Նա հավելեց, որ ՀԱՖՆ-ը կղեկավարի նաև Դմիտրի Յուրովսկին, որը դիրիժորների հայտնի գերդաստանից է: Փորձառու երաժիշտները ոչ միայն հանդես կգան համերգներով, այլև կանցկացնեն վարպետության դասեր պատանի հայ երաժիշտների համար:

Հատկանշական է՝սեպտեմբերի 20-ին կայանալիք համերգի ժամանակ, որը նվիրված է «Հովարդ Կարագյոզյան» հիշատակի հիմնադրամի 95-ամյակին, ելույթ կունենան ժամանակի ամենահայտնի հայ երաժիշտները՝ Սերգեյ Խաչատրյանը և Նարեկ Հախնազարյանը: Փառատոնի շրջանակներում ՀԱՖՆ-ը՝ Ալեքսանդր Չաուշյանի նախաձեռնությամբ, կմեկնի Ստեփանակերտ, որտեղ ելույթ կունենա Երիտասարդության պալատում: Թավջութակահարը, ինչպես նաև դաշնակահար Նարե Արղամանյանը վարպետության դասեր կանցկացնեն արցախցի երաժիշտների համար:

Էդուարդ Թոփչյանը նշեց, որ այս տասնամյակի ընթացքում փառատոնը մեծ ձեռքբերումներ է ունեցել. «Երևանյան փառատոնի անունը ճանաչելի է ամբողջ աշխարհում: Նվագախումբը, անընդհատ շփվելով բարձրակարգ երաժիշտների հետ, անդադար աշխատելով, դարձել է շատ լավ նվագախումբ. սա ամենամեծ ձեռքբերումն է: Սակայն մենք այս արդյունքի վրա չենք կանգնում»,-ասաց մաեստրոն: Ավանդույթի համաձայն՝ տեղի կունենա նաև հայ կոմպոզիտորների հոբելյաններին նվիրված համերգներ՝ Լևոն Չաուշյանի 70-ամյակը և Առնո Բաբաջանյանի 95-ամյակը: «Նվագախումբը գտնվում է արտակարգ վիճակում: Կարծում եմ՝ այս երեկո ՝ բացման համերգի ժամանակ երաժշտասերները կհամոզվեն դրանում»,- եզրափակեց Էդուարդ Թոփչյանը:

Աղբյուրը

VN:F [1.9.20_1166]
Rating: 5.0/5 (1 vote cast)
VN:F [1.9.20_1166]
Rating: 0 (from 0 votes)

spacer

Հայաստանի ազգային ֆիլհարմոնիկ նվագախմբի 90-ամյակի հոբելյանական միջոցառումներն ամփոփվեցին

Vlad MouradyanJune 30th, 2016
by
under Հայերեն հոդվածներ.
No Comments.

Հայաստանի Ազգային ֆիլհարմոնիկ նվագախմբի հիմնադրման 90-ամյակի հոբելյանական միջոցառումներն սկսվեցին 2016-ի մարտի 4-ին և շքեղ գալա համերգով ամփոփվեցին հունիսի 28-ին: ՀՀ Մշակույթի նախարարության աջակցությամբ 90-ամյա ֆիլհարմոնիկ նվագախմբի հոբելյանն անցկացվեց «ՀԱՖՆ 90»խորագրի ներքո՝ ընդգրկելով 7 համերգ, «ՀԱՖՆ-ի երախտավորները» գրքերի ցուցահանդես, գիտական կոնֆերանս, այցելություն ՀԱՖՆ-ի գլխավոր դիրիժորների շիրիմներին, Արշակ Ադամյանի հուշաքարի բացում, «Հոբելյանական նոտաներ» ֆիլմի պրեմիերա: Վավերագրական ժանրի ֆիլմը պատրաստվել է Հանրային հեռուստաընկերության պատվերով և ՀՀ Մշակույթի նախարարության աջակցությամբ: Բեմադրող ռեժիսոր՝Ավագ Ավագյան, սցենարի հեղինակ՝Սոնա Ալեքսանյան, երկրորդ ռեժիսոր՝ Սոնա Մարության, բեմադրող օպերատոր՝ Արտավազդ Խաչատուրյան, մոնտաժոր՝ Արսեն Զատիկյան, խորհրդատու՝ Մարինա Վարդանյան,դերասան՝ Արմեն Մարգարյան, գլխավոր պրոդյուսեր՝ Կարեն Ղազարյան:

Նույն օրը՝ Մաշտոցի 43 հասցեում (Խամաճիկների թատրոնի հարևանությամբ) ՀԱՖՆ-ի առաջին գեղարվեստական ղեկավար և գլխավոր դիրիժոր Արշակ Ադամյանի հուշաքարի հանդիսավոր բացման արարողությունն էր:

Երկար սպասված շքեղ գալա համերգը դարձավ պատմական ու հիշարժան շնորհիվ հյուրերի՝ հայ երաժշտարվեստի այսօրվա մեծագույն անունների՝ սոպրանո Հասմիկ Պապյանի, ջութակահար Սերգեյ Խաչատրյանի, բաս Բարսեղ Թումանյանի, թավջութակահար Ալեքսանդր Չաուշյանի և դաշնակահար Վահագն Պապյանի: Կատարվեցին հայ և համաշխարհային դասականների հայտնի ստեղծագործություններ: Դիրիժորական վահանակի մոտ էր Հայաստանի Ազգային ֆիլհարմոնիկ նվագախմբի գեղարվեստական ղեկավար և գլխավոր դիրիժոր էդուարդ Թոփչյանը:

Երեկոյին ներկա էին բազմաթիվ բարձրաստիճան հյուրեր՝ ի դեմս Հանրապետության Նախագահ Սերժ Սարգսյանի, Առաջին տիկին Ռիտա Սարգսյանի և Մշակույթի նախարար Հասմիկ Պողոսյանի:

Հիշարժան էին պարգևատրման արարողությունները. ՀՀ Նախագահ Սերժ Սարգսյանի որոշմամբ՝ ՀԱՖՆ-ի գեղարվեստական ղեկավար և գլխավոր դիրիժոր ԷԴՈՒԱՐԴ ԹՈՓՉՅԱՆԸ  պարգևատրվեց «Հայրենիքին մատուցած ծառայությունների համար» 2-րդ աստիճանի մեդալով: Երաժշտարվեստում ունեցած նշանակալի ավանդի, ինչպես նաև Ազգային Ֆիլհարմոնիկի 90-ամյակի կապակցությամբ նվագախմբի տուբահարՎԱՂԱՐՇԱԿ ՊԵՊԱՆՅԱՆԻՆ և շեփորահար ՇԱՀԵՆ ԳևՈՐԳՅԱՆԻՆ շնորհվեց ՀՀ վաստակավոր արտիստի պատվավոր կոչում:

Երաժշտարվեստի զարգացման և տարածման գործում ունեցած նշանակալի ավանդի համար, ինչպես նաև Հայաստանի ազգային ֆիլհարմոնիկ նվագախմբի հիմնադրման 90-ամյակի կապակցությամբ՝ Հայաստանի ազգային ֆիլհարմոնիկ նվագախմբի հոբոյահար ՀԱՐՈՒԹՅՈՒՆ ՇԱԽԿՅԱՆԸ, Հայաստանի ազգային ֆիլհարմոնիկ նվագախմբի փոխկոնցերտմայստեր ԱՐԱՄ ԱՍԱՏՐՅԱՆԸ, Հայաստանի ազգային ֆիլհարմոնիկ նվագախմբի 2-րդ ջութակների կոնցերտմայստեր ԱՆԱՀԻՏ ԱՍԼԱՆՅԱՆԸ, Հայաստանի ազգային ֆիլհարմոնիկ նվագախմբի ջութակահար ՀՐԱՉԻԿ ՀԱԿՈԲՅԱՆԸ, Հայաստանի ազգային ֆիլհարմոնիկ նվագախմբի ալտահարների խմբի փոխկոնցերտմայստեր ԼՈՒՍԻԿ ԱՌԱՔԵԼՅԱՆԸ, Հայաստանի ազգային ֆիլհարմոնիկ նվագախմբի կլարնետահարների խմբի փոխկոնցերտմայստեր ՍՈՒՐԵՆ ԽՈՐՈԶՅԱՆԸ, Հայաստանի ազգային ֆիլհարմոնիկ նվագախմբի հարվածայինների խմբի փոխկոնցերտմայստեր ԱԼԵՔՍԱՆԴՐ ՍԱՀԱԿՅԱՆԸ,Հայաստանի ազգային ֆիլհարմոնիկ նվագախմբի թավջութակահարների խմբի փոխկոնցերտմայստեր ԿԱՐԵՆՔՈՉԱՐՅԱՆԸ պարգևատրվել են Հայաստանի Հանրապետության մշակույթի նախարարության ոսկե մեդալով:

Երևանի քաղաքապետի որոշմամբ՝ Հայաստանի ազգային ֆիլհարմոնիկ նվագախմբի 90-ամյակի առթիվ ֆիլհարմոնիկ նվագախումբը պարգևատրվեց «Երևանի զինանշան» հուշամեդալով:

VN:F [1.9.20_1166]
Rating: 0.0/5 (0 votes cast)
VN:F [1.9.20_1166]
Rating: 0 (from 0 votes)

spacer

Նրանց մեծ մասը մայրաքաղաքում առաջին անգամ ներկա կգտնվի դասական երաժշտության համերգի

June 14th, 2016
by
under Հայերեն հոդվածներ.
No Comments.

«Արամ Խաչատրյան» համերգասրահում Էդուարդ Թոփչյանի ղեկավարությամբ Հայաստանի ազգային ֆիլհարմոնիկ նվագախմբի (ՀԱՖՆ) հունիսի 4-ին կայանալիք համերգը՝ նվիրված Եվրոպայի օրվան, երաժիշտների շրջանում ոգեւորություն է առաջացրել՝ դրական եւ բացասական առումներով: Այդ համերգին իբրեւ հանդիսատես ներկա կլինեն հայաստանյան մարզերի երաժշտական ուսումնական հաստատությունների սաները: Այս առիթով «Առավոտի» հետ զրույցում արվեստագետներն առաջին հերթին միանշանակ ողջունելով այդ գաղափարը, միեւնույն ժամանակ փաստում էին, մայրաքաղաքային առատ մշակութային կյանքին հակառակ՝ մարզերում դասական արվեստի, չասենք իսպառ, բայց գոնե ոչ բավարար ներկայությունը: Արդարության դեմ չմեղանչելու համար նշենք, որ մշակույթի նախարարությունը իրականացնում է մարզային ծրագիր: Որոշ երաժիշտներ էլ իրենց նախաձեռնությամբ, օրինակ՝ Ա. Խաչատրյանի անվան դաշնամուրային տրիոյի արտիստները, ժամանակ առ ժամանակ ոչ միայն համերգներով հանդես են գալիս մարզերում, այլեւ վարպետության դասեր անցկացնում երաժշտական դպրոցներում:

Մեզ հետ զրույցում ՀԱՖՆ-ի տնօրեն Ռուզաննա Սիրունյանը նշեց, որ Եվրոպայի օրվան նվիրված համերգը իրենց եւ Հայաստանում եվրոպական միության պատվիրակության (ղեկավար, դեսպան՝ նորին գերազանցություն Պյոտր Անտոնի Սվիտալսկի) երկկողմ համաձայնության արդյունք է: «Եվրոպական միության պատվիրակության հետ սա մեր առաջին համագործակցությունը չէ: Բանակցությունների արդյունքում ընտրեցինք այս ձեւաչափը: Մարզային երաժշտական դպրոցների սաներն այդ օրը համերգին ներկա են գտնվելու իբրեւ հանդիսատես: Եվ նրանցից շատերը մայրաքաղաքում ներկա չեն գտնվել դասական երաժշտության երեկոների: Իսկ միգուցե «Խաչատրյան» համերգասրահի գտնվելու վայրն էլ չգիտեն, հավանաբար մեծանուն կոմպոզիտորի արձանն էլ չեն տեսել… Կազմակերպչական աշխատանքները սկսել ենք վաղուց՝ համագործակցելով մարզպետարանների եւ քաղաքապետարանների մշակույթի վարչությունների հետ: Դեռեւս չկայացած համերգի առիթով մի փաստ եմ ուզում արձանագրել. ոգեւորությունն աննկարագրելի մեծ է, երաժշտական դպրոցների մանկավարժների եւ սաների արձագանքը նույնպես»,- հայտնեց տիկին Սիրունյանը: Մեր զրուցակիցը հիշեցրեց, որ ԵՄ-ի եւ Հայաստանի միջեւ հարաբերություններն ամրագրված են 1999թ. ԵՄ-Հայաստան գործընկերության եւ համագործակցության համաձայնագրում, որը թույլ է տալիս իրականացնել լայնածավալ աշխատանք ոչ միայն քաղաքական երկխոսության, առեւտրի, ներդրումների, տնտեսության, օրենսդրության, այլեւ մշակույթի ոլորտներում:

Անդրադառնալով Եվրոպայի օրվան նվիրված համերգին, Ռուզան Սիրունյանը տեղեկացրեց, որ երեկոյին ֆիլհարմոնիկ նվագախմբի հետ իբրեւ մենակատարներ հանդես կգան դահլիճում ներկա հանդիսատեսի հասակակիցները՝ երեւանյան երաժշտական դպրոցների 3 սաներ, որոնք ոչ միայն հայաստանյան տարբեր մրցույթների դափնեկիրներ են, այլեւ հաջողությունների են հասել միջազգային տարբեր միջոցառումներին: «Օրինակ, ջութակահարուհիներ Սոֆյա Վարդանյանը եւ Դիանա Ադամյանը սովորում են Չայկովսկու անվան երաժշտական դպրոցում, Սոֆյան՝ Արտաշես Մկրտչյանի, Դիանան՝ պրոֆեսոր Էդուարդ Թադեւոսյանի ղեկավարությամբ: Սոֆյան անցյալ տարի Երեւանյան 9-րդ միջազգային փառատոնի շրջանակներում հանդես է եկել Բրամսի Սեքստետի կատարմամբ՝ համագործակցելով մեր հայրենակիցներ, անվանի երաժիշտներ Իդա Կավաֆյանի եւ Լեւոն Չիլինկիրյանի հետ: Այս տարվա մայիսին էլ մասնակցել է Գերմանիայում պրոֆեսոր Լաուրենտ Ալբրեխտ Բրոյնինգերի դասընթացներին եւ հանդես եկել եզրափակիչ համերգին: Իսկ Դիանան անցյալ տարի ելույթ է ունեցել Լոնդոնի թագավորական նվագախմբի հետ՝ Ցուկերմանի ղեկավարությամբ: Համերգի մյուս մենակատարը դաշնակահար Հարություն Մելիքյանն է, որը սովորում է Ստեփան Ջրբաշյանի անվան երաժշտական դպրոցում, պրոֆեսոր Վաղարշակ Հարությունյանի դասարանում: Իսկ 2015թ. Իսպանիայում կայացած պատանի դաշնակահարների միջազգային մրցույթում էլ արժանացել է 2-րդ մրցանակի: Մենակատար երեք երաժիշտները քանիցս մասնակցել են անվանի արվեստագետների կողմից անցկացվող վարպետության դասերին, հանրապետական եւ միջազգային մրցույթների ու փառատոների»,- մանրամասնեց տիկին Սիրունյանը: Հավելեց նաեւ, իր ձեւակերպմամբ՝ «մեր փոքրիկ հանդիսատեսները կվայելեն համաշխարհային երաժշտական գանձարանից Բախի, Մոցարտի, Մենդելսոնի, Շոպենի, Սմետանայի ստեղծագործությունները»:

ՍԱՄՎԵԼ ԴԱՆԻԵԼՅԱՆ

VN:F [1.9.20_1166]
Rating: 5.0/5 (1 vote cast)
VN:F [1.9.20_1166]
Rating: 0 (from 0 votes)

spacer

«Զենք բռնել չգիտեմ, բայց որ պետք լինի՝ կսովորեմ». Էդուարդ Թոփչյան

April 12th, 2016
by
under Հայերեն հոդվածներ.
No Comments.

Կասկադում, մեկնարկեց «Զինվորիս հետ» խորագիրը կրող բացօթյա բարեգործական համերգ-դրամահավաք, որից ստացված ողջ հասույթը կուղղվի պատերազմում զոհված զինվորների և ազատամարտիկների ընտանիքներին: Համերգ-դրամահավաքը կազմակերպել է Հայաստանի ազգային ֆիլհարմոնիկ նվագախումբը՝ գեղարվեստական ղեկավար և գլխավոր դիրիժոր Էդուարդ Թոփչյանի նախաձեռնությամբ: Համերգին մասնակցում է նաև Հայաստանի ազգային ակադեմիական երգչախումբը՝ գեղարվեստական ղեկավար Հովհաննես Չեքիջյանի գլխավորությամբ: Համերգի ընթացքում հնչում են բացառապես հայ կոմպոզիտորների ստեղծագործություններ:

«Սա մեր՝ Հայաստանի ազգային ֆիլհարմոնիկ նվագախմբի առաջին ներդրումն է, որն այս անգամ որոշեցինք մեծամասշտաբ համաքաղաքային ակցիայի ձևով անցկացնել: Կնվագենք այն հանդիսատեսի համար, ովքեր կգան միանալու մեր համերգ-դրամահավաքին: Այստեղ երկու կողմերից հանգանակության արկղեր են դրված, ու պիտի խնդրենք, որ մեր համաքաղաքացիները միանան դրամահավաքին: Թեև ես հասկանում եմ, որ սա մեծ օգնություն չէ ստեղծված իրավիճակում, բայց մենք շարունակելու ենք մեր ուժերի չափով, գոնե մեր հոգու հանգստության համար ամեն կերպ մասնակից ու նեցուկ դառնալ սահմանին կանգնած մեր զինվորներին»,- համերգի մեկնարկից առաջ լրագրողների հետ զրույցում ասաց Էդուարդ Թոփչյանը:

Ստացված հասույթը, ինչպես նշեց մաեստրո Թոփչյանը, կտրամադրվի այս օրերին սահմանում զոհված ազատամարտիկների ընտանիքներին. «Մենք երկար ժամանակ մտածում էինք՝ բանակի՞ն ուղարկել հավաքված հասույթը, թե՞ զոհված ազատամարտիկների ընտանիքներին, բայց այսօր բարձրաստիճան ատյանների հետ ունեցած խորհրդակցություններից հետո որոշվեց, որ հանգանակված ողջ գումարները կտրամադրվեն զոհված ազատամարտիկների ընտանիքներին, ինչը մենք սիրով կանենք»:

Կշարունակվի՞ հարաբերական զինադադարը, թե՞ կվերաճի նոր պատերազմի, Էդուարդ Թոփչյանը դժվարանում է պատասխանել. «Ես ինձ շատ վատ եմ զգում, որ չեմ կարողանում սահմանի բերանին կռիվ տվող տղաներին ինչ-որ բանով օգնել: Մեկ-մեկ մտածում եմ, թե ինչի՞ եմ ես հիմա այստեղ: Զենք բռնել էլ չգիտեմ, բայց որ պետք լինի՝ կսովորեմ: Ես երազում եմ, որ էլ ոչ մի հայ մարդ չզոհվի, և դա հիմա կոնկրետ ինձ համար ամենակարևոր առաջնահերթություններից է»:

VN:F [1.9.20_1166]
Rating: 5.0/5 (1 vote cast)
VN:F [1.9.20_1166]
Rating: 0 (from 0 votes)

spacer

Ֆիլհարմոնիկը՝ Արցախի համար

April 8th, 2016
by
under Հայերեն հոդվածներ.
No Comments.

Ֆիլհարմոնիկը՝ Արցախի համար «Հայաստանի ազգային ֆիլհարմոնիկ նվագախումբը (գեղարվեստական ղեկավար՝ Էդուարդ Թոփչյան) ապրիլի 9-ին Կասկադ համալիրում նախաձեռնում է բացօթյա համերգ եւ դրամահավաք՝ «Զինվորիս հետ» խորագրով՝ հանուն մեր Արցախի, հանուն մեր զինվորների, հանուն մեր նահատակների, հանուն մեր հայրենիքի, հանուն Մենք-ի»,- «Առավոտին» տեղեկացրեց նվագախմբի տնօրեն, ՀՀ մշակույթի վաստակավոր գործիչ Ռուզաննա Սիրունյանը: Հավելեց նաեւ, թե շուրջ 3 ժամ Ֆիլհարմոնիկի հետ բեմում կլինեն Հովհաննես Չեքիջյանի ղեկավարած Ազգային ակադեմիական երգչախումբը, երգիչ-երգահան Վահան Արծրունին եւ Արա Գեւորգյանի ժողովրդական գործիքների խումբը: Ծրագիրը կներառի գերազանցապես հայ կոմպոզիտորների դասական ստեղծագործություններ, հայրենասիրական երգեր եւ Արա Գեւորգյանի հայտնի մշակումները: Ոգեշնչող խոսքով էլ հանդես կգան մշակույթի հայտնի գործիչներ: Այս գաղափարը ողջունել են Երեւանի քաղաքապետարանն ու մշակույթի նախարարությունը:

Հետաքրքրությանը, թե այս օրերին Արցախ մեկնած որոշ արվեստագետների եւ շոու-բիզնեսի արտիստների օրինակով հնարավոր չէ՞ր քանիցս Արցախում համերգներ ունեցած ֆիլհարմոնիկն էլ մեկներ եւ տեղում «դասական» ոգեւորություն փոխանցեր, տիկին Սիրունյանը հավաստիացրեց. «Պատերազմական գործողությունների սկսվելուն պես այդ ցանկությունը կար թե նվագախմբի երաժիշտների եւ թե գեղարվեստական ղեկավարի մոտ: Իսկապես ուզում էինք մեր արվեստով կանգնել զինվորի կողքին ու ոգեւորել մեր զավակներին: Սակայն դա կիրականացնենք ավելի ուշ: Մենք մեր զինվորի կողքին ենք գիշեր ու ցերեկ: Յուրաքանչյուր լուր լսելիս էլ խառնվում են արցունքներն ու հպարտության զգացումը… Կասկած անգամ չունեմ, որ մեզ ու աշխարհով մեկ սփռված մեր հայրենակիցներին ձգում է Արցախը: Հասկանալի պատճառով՝ բոլորս չենք կարող մեկնել… Եվ այս պահին ֆիլհարմոնիկի տեղն այստեղ է»:

VN:F [1.9.20_1166]
Rating: 0.0/5 (0 votes cast)
VN:F [1.9.20_1166]
Rating: 0 (from 0 votes)

spacer

«Բոհեմի» այս կատարումը պետք էր ձայնագրել եւ թողարկել CD» – Հասմիկ Պապյան

April 2nd, 2016
by
under Հայերեն հոդվածներ.
No Comments.

Նման գնահատանքի արժանացրեց Պուչինիի հանրահայտ ստեղծագործության երեւանյան կատարումը օպերային դիվա Հասմիկ Պապյանը Շուրջ 15 տարի Հայաստանի ազգային ֆիլհարմոնիկ նվագախումբը (ՀԱՖՆ)՝ գեղարվեստական ղեկավար եւ գլխավոր դիրիժոր Էդուարդ Թոփչյանի ղեկավարությամբ, ներկայանում է նաեւ համաշխարհային օպերային գրականության ընտիր նմուշների (շուրջ 15) համերգային եւ թատերականացված կատարումներով:

Օրերս «Արամ Խաչատրյան» համերգասրահում ՀԱՖՆ-ն հանդես եկավ հերթական՝ Պուչինիի «Բոհեմ» օպերայի թատերականացված մատուցմամբ, որն իրականացրել է ռեժիսոր Սուքիաս Թորոսյանը: Վերջինիս մասնակցությամբ ՀԱՖՆ-ն նախկինում մատուցել է Լեոնկավալոյի «Պայացներ», Վերդիի «Ռիգոլետո», Պուչինիի «Տոսկա» եւ «Մադամ Բաթերֆլայ» օպերաները: Տեսարաններ «Բոհեմից»: «Բոհեմում» դերերգերով հանդես եկան սոպրանոներ Իրինա Զաքյանը (Միմի), Ֆրանսիայից Լուսինե Լեւոնին (Մյուզետ), տենոր Տիգրան Օհանյանը (Ռուդոլֆ), բարիտոն Դավիթ Բաբայանցը (Մարսել), Գերմանիայից բարիտոն Գուրգեն Բավեյանը (Շոնար), Բուլղարիայից բաս Պլամեն Կումպիկովը, բաս Սարգիս Բաժբեուկ-Մելիքյանը (Բենուա), բաս Հովհաննես Ներսիսյանը (Ալսինդոր), մասնակցությամբ Սոնա Հովհաննիսյանի ղեկավարած «Հովեր» պետական կամերային եւ Կարինե Առաքելյանի ղեկավարած Ձայնի պահպանման վոկալ- երգչախմբային մասնագիտական դպրոցի երգչախմբերի:

Լուսանկարում՝ Սուքիաս Թորոսյանը, Հասմիկ Պապյանը եւ Ռուզաննա Սիրունյանը: Հայաստանցի եւ հրավիրյալ հայ երգիչները հանդիսատեսին ծանոթ էին, բացառությամբ՝ Պլամեն Կումպիկովի: Նա մինչ բեմելը «Առավոտին» նախ հայտնեց, թե իր հայրենիքում եւ արտասահմանյան թատրոններում «Բոհեմ» ներկայացման մեջ հանդես է եկել շուրջ 60 անգամ, հետո էլ առանց մանրամասնելու հավաստիացրեց, որ սա իր առաջին համերգային այցը չի լինի մեր երկիր: Գուցե հանդիսատեսին ծանոթ չէր միայն Տիգրան Օհանյանի անունը, որը Երեւանի Կոմիտասի անվան պետական կոնսերվատորիայի ուսանող է, սովորել է նախ պրոֆեսոր Ռաֆայել Հակոբյանցի, ապա ուսումը շարունակում է պրոֆեսոր Սուսաննա Մարտիրոսյանի ղեկավարությամբ: Այս տարվանից էլ ընդգրկված է Ազգային օպերային թատրոնի Երիտասարդ օպերային երգիչների ծրագրում:

Մասնագիտական խոսքը թողնելով երաժշտագետներին, միայն փաստենք, որ օպերայի վերջում հանդիսատեսի կողմից, որի շարքում կային ճանաչված շատ անուններ, երկար ժամանակ չէին դադարում բրավոները: Մենք միայն ավստրիաբնակ օպերային երգչուհի Հասմիկ Պապյանից կարծիք խնդրեցինք, որն այս օրերին հրավիրված էր Երեւան՝ մասնակցելու ՀՀ նախագահի երիտասարդական մրցանակի համար ժյուրիի աշխատանքներին: Հեղինակավոր օպերային թատրոնների ցանկալի հյուրը հայտնեց միայն հետեւյալը, ինչը ներկայացնում ենք առանց մեկնաբանության. «Բոհեմի» այս կատարումը պետք էր ձայնագրել եւ թողարկել CD»:

Տեղեկացնենք, որ Պուչինիի «Բոհեմ» օպերան Երեւանի թատրոնում առաջին անգամ բեմադրվել է 1936թ., բեմադրող դիրիժոր Միքայել Թավրիզյանի եւ ռեժիսոր Լեւոն Քալանթարի կողմից: Գլխավոր՝ Միմիի եւ Ռուդոլֆի դերերգերով հանդես են եկել Հայկանուշ Դանիելյանը եւ Արսեն Ավագյանը: Երկրորդ անգամ հիշյալ օպերան 1945թ. բեմադրել են դիրիժոր Միքայել Մալունցյանն ու ռեժիսոր Գոհարինե Մելքումյանը: Գլխավոր դերերգերն էլ կատարել են Ելենա Ֆանարջյանն ու Գալուստ Գաբրիելյանը: Վերջին անգամ «Բոհեմը» Երեւանում ներկայացվել է 1985թ., Նորայր Սարգսյանի ռեժիսուրայով եւ Յուրի Դավթյանի ղեկավարությամբ, իսկ գլխավոր դերերգերի իրենց մեկնաբանությունն են բերել Հասմիկ Պապյանը եւ երջանկահիշատակ Գեղամ Գրիգորյանը:

ՍԱՄՎԵԼ ԴԱՆԻԵԼՅԱՆ 

© 1998 – 2016 Առավոտ – Լուրեր Հայաստանից

VN:F [1.9.20_1166]
Rating: 5.0/5 (1 vote cast)
VN:F [1.9.20_1166]
Rating: 0 (from 0 votes)

spacer

Վաստակած 90 տարի

March 22nd, 2016
by
under Հայերեն հոդվածներ.
No Comments.

Այս տարվա մարտի 4-ից մեկնարկել է Հայաստանի ազգային ֆիլհարմոնիկ նվագախմբի հոբելյանական համերգաշարը Արամ Խաչատրյան համերգասրահում ապրիլի 19-ին կկայանա գալա համերգ՝ նվիրված Հայաստանի ազգային ֆիլհարմոնիկ նվագախմբի (ՀԱՖՆ) հոբելյանին: Այս մասին «Առավոտին» հայտնեց նվագախմբի տնօրեն, ՀՀ մշակույթի վաստակավոր գործիչ Ռուզաննա Սիրունյանը: ՀԱՖՆ-ն հիմնադրվել է 90 տարի առաջ՝ երաժշտագետ, դիրիժոր Արշակ Ադամյանի եւ կոմպոզիտոր Ալեքսանդր Սպենդիարյանի կողմից: Տարբեր տարիների նվագախումբը գլխավորել են Ա. Ադամյանը, Ալ. Սպենդիարյանը, Ս. Չարեքյանը, Գ. Բուդաղյանը, Կ. Սարաջյանը, Մ. Մալունցյանը, Օ. Դուրյանը, Մ. Տերյանը, Ռ. Վարդանյանը, Ա. Քաթանյանը, Դ. Խանջյանը, Վ. Գերգիեւը, Վ. Պապյանը, Լ. Ճգնավորյանը: 2000 թվականից Հայաստանի ազգային ֆիլհարմոնիկ նվագախմբի գեղարվեստական ղեկավար եւ դիրիժորն է Էդուարդ Թոփչյանը: Հիմնադրման օրվանից մինչ օրս կոլեկտիվը կատարել է սիմֆոնիկ երաժշտության գրեթե ողջ դասական երկացանկը, հայ դասական եւ ժամանակակից կոմպոզիտորների ստեղծագործությունները, ինչպես նաեւ հանդես եկել համաշխարհային օպերային գրականության հայտնի նմուշների համերգային կատարումներով, բեմականացումներով եւ բեմադրություններով: Նվագախմբի հետ ելույթ են ունեցել իսկապես համաշխարհային հռչակ վայելող երաժիշտներ, այդ թվում՝ Դ. Օյստրախը, Ս. Ռիխտերը, Մ. Ռոստրոպովիչը, Է. Գիլելսը, Ս. Իսերլիսը, Մ. Մայսկին, Ս. Նակարյակովը, Բ. Բերեգովսկին, Ն. Գուտմանը, Ջ. Ջակոմինին, Ի. Ֆաուստը, Ջ. Ֆիշերը, Պ. Ցուկերմանը, Գ. Կրեմերը, Յ. Բաշմետը, Պ. Դոմինգոն, Կ. Գերշտեյնը: Հաճախ նվագախումբը հյուրընկալել է ճանաչված մեր հայրենակիցներին՝ Սերգեյ Խաչատրյանին, Քիմ Քաշքաշյանին, Սերգեյ Բաբայանին, Իզաբել Բայրաքդարյանին, Նարեկ Հախնազարյանին եւ այլ հայտնիների: Նվագախմբի դիրիժորական վահանակի առջեւ են կանգնել լեգենդար դիրիժորներ Ալեքսանդր Մելիք-Փաշաեւը, Վիլլի Ֆեռերոն, Կառլո Ցեկկին, Ֆրանց Կոնվիչնին, Կուրտ Մազուրը, Վալերի Գերգիեւը, եւ այլք: Արաքս եւ Տիգրան Մանսուրյանները, Իրինա Զաքյանը եւ Ռուզաննա Սիրունյանը (աջից): 1989թ. սկսվել են ՀԱՖՆ-ի համերգային շրջագայությունները՝ ԱՄՆ, Կանադա, Գերմանիա, Ֆրանսիա, Շվեյցարիա, Լիբանան, Իսպանիա, Պորտուգալիա, Անգլիա, Հունաստան, Իրան, Կիպրոս, Թուրքիա, ԱՄԷ, Ճապոնիա, Ռուսաստան եւ այլն: Վերջին շրջանում նվագախումբը հանդես է եկել 15 համերգներով Ճապոնիայում, Սլովակիայում, Գերմանիայում, մասնակցել Իտալիայի Ռիմինի, Չիտտա դե Կաստելլո, Մերանո եւ Ռավելլո քաղաքներում ավանդաբար անցկացվող 4 փառատոներում: 2015-ին կայացան նվագախմբի հյուրախաղերը Ավստրիայում, Գերմանիայում, Իտալիայում, Սկանդինավյան երկրներում եւ ԱՄՆ-ում: «Առավոտի» հետ զրույցում Ռուզաննա Սիրունյանը նշեց, որ ընթացիկ համերգաշրջանում Է. Թոփչյանի ղեկավարությամբ նախատեսված են համերգներ՝ Ռուսաստանում, Լեհաստանում, Ֆրանսիայում, Գերմանիայում, Իսպանիայում, Ճապոնիայում եւ Չինաստանում: 2015թ. Ֆիլհարմոնիկը 9-րդ անգամ անցկացրեց Երեւանյան միջազգային երաժշտական ամենամյա փառատոնը, որտեղ հրավիրված էին ինչպես ճանաչված, այնպես էլ լեգենդար երաժիշտներ, որն անցկացվում է ՀՀ նախագահի տիկին Ռիտա Սարգսյանի հովանո ներքո: Ռուզաննա Սիրունյանը նաեւ հավելեց, որ Ֆիլհարմոնիկի 90-ամյա հոբելյանին նվիրված միջոցառումները սկսվել են այս տարվա մարտի 4-ից, անցկացվել է համերգ՝ նվիրված Ալեքսանդր Թամանյանին, երեկո՝ ի պատիվ ՀԱՖՆ-ի գործընկեր հովանավորներ «ՎիվաՍել ՄՏՍ»-ի, ՀԲԸՄ-ի, «Արարատ» կոնյակի գործարանի: Օրերս էլ Սպենդիարյանի տուն-թանգարանում կայացավ «ՀԱՖՆ-ի երախտավորները» գրքերի ցուցահանդեսը եւ շնորհանդեսը՝ նվիրված Ֆիլհարմոնիկի վետերաններին: «Ծրագրված է Արամ Խաչատրյանի տուն-թանգարանում անցկացնել գիտաժողով՝ նվիրված Ֆիլհարմոնիկի երախտավորներին, որտեղ ելույթներով հանդես կգան ՀՀ ԳԱԱ Արվեստի ինստիտուտի, ՀՀ կոմպոզիտորների միության եւ Երեւանի կոնսերվատորիայի ճանաչված մասնագետները, այցելություն Ֆիլհարմոնիկի գլխավոր դիրիժորների շիրիմներին, իսկ ապրիլի 19-ին կբացվի Արշակ Ադամյանի հուշաքարը: Մարտի 29, 31-ին հրավիրում ենք Պուչինիի «Բոհեմ» օպերայի (ռեժիսոր՝ Սուքիաս Թորոսյան) բեմականացված տարբերակի դիտմանը, այնուհետեւ մեկ երեկո կտրամադրենք միայն հայ կոմպոզիտորների ստեղծագործություններին, իսկ հետո գերմանացի դաշնակահար Կատարինա Թրոյթլերը իր ելույթով կշնորհավորի Ֆիլհարմոնիկի հոբելյանը, եւ այլն: Ապրիլի 13-ին կկայանա «ՀԱՖՆ 90» ֆիլմի (ռեժիսոր՝ Ավագ Ավագյան) պրեմիերան: Մինչ հոբելյանական գալա համերգը՝ առաջին անգամ Ֆիլհարմոնիկի մատուցմամբ կհնչեն Բրամսի չորս սիմֆոնիաները… անակնկալները իսկապես շատ են, բոլորը թվարկել հնարավոր չէ»,- ասաց տիկին Սիրունյանը:

VN:F [1.9.20_1166]
Rating: 5.0/5 (1 vote cast)
VN:F [1.9.20_1166]
Rating: 0 (from 0 votes)

spacer

ԴԻՐԻԺՈՐԸ ԲԱՐԻ, ԴՐԱԿԱՆ ԲՌՆԱՊԵՏ Է. ԼԻՈՐ ՇԱՄԲԱԴԱԼ

February 29th, 2016
by
under Հայերեն հոդվածներ.
No Comments.

Գերմանացի դիրիժոր Լիոր Շամբադալը Հայաստանի ազգային ֆիլհարոմնիկ նվագախմբի հետ փետրվարի 26-ին Արամ Խաչատրյան համերգասրահում ներկայացրեցՄենդելսոնյան երաժշտության երեկո: Շամբադալը երրորդ անգամ էր Հայաստանում: Հանրաճանաչ դիրիժորը համերգից առաջ զրուցեց մեզ հետ:

 

Դուք շատ հայտնի և նշանավոր  ուսուցիչներ եք ունեցել: Ո՞վ է ամենամեծ ազդեցությունն ունեցել Ձեզ վրա:
Առաջին հերթին պետք է բաժանեմ իմ ուսուցիչներին: Ես ունեցել եմ կոպմոզիցիայի դասախոսներ և դասախոսներ, ում մոտ դիրիժորություն եմ ուսանել: Իմ կոմպոզիցիայի դասախոսներն են եղել Անրի Դյուտիեն, Վիտոլդ Լյուտոսլավսկին, Վիեննայում ես սովորել եմ Քաուֆմանի մոտ: Մեկ այլ դասախոս էլ Իսրայելում եմ ունեցել, իսկապես հրաշալի կոմպոզիտոր Սերջիու Նատրան: Նա տավիղի համար երաժշտություն գրող ամենահայտնի կոմպոզիտրոն է այսօր: Շատ բարդ է ասել` ով է ամենամեծ ազդեցությունն ունեցել ինձ վրա, շատ բարդ է առանցնացնել որևէ մեկին: Բայց այնուամենայնիվ… երևի Դյուտիեն ամեկարևորն է եղել ինձ համար, որովհետև նա շատ պարզ մարդ էր: Ինձ առաջին դասին մի նախադասություն ասաց. «Ես ֆրանսիացի կոմպոզիտոր եմ»: Նշեց ազգությունը: Բայց դա իր ազգությունը չէր, այլ իր երաժշտության:
Դիրիժորություն սովորելու հարցում ևս շատ դժվար է ասել՝ ով է ամենից մեծ ազդեցությունն ունեցել: Դիրիժորության մեջ դժվար է ուսուցիչ գտնել: Այստեղ կարևոր է ոչ թե այն, թե դու որ ուսումանկան հաստատությունում կսովորես, դու պետք է ոգեշնչող գտնես, մեկին, ով կհավատա քեզ որպես դիրիժորի, դու պիտի գտնես, դու պիտի ընտրես նրան: Սովորաբար ինչպե՞ս է լինում. մենք գնում ենք բուհ և սկսում ենք սովորել մեկի մոտ, բայց դիրիժորության մեջ այդպես չէ. եթե դու իսկապես բարձրակարգ կրթություն ես ուզում, դու պետք է գտնես դիրիժորի, ով քեզ համար ժամանակ կգտնի, դու կհավատաս նրան, և նա կհավատա քեզ: Սա ամենակարևոր բանն է: Ես հիմա օրը 10 անգամ կարող եմ ասել. «Շնորհակալ եմ, Աստված, որովհետև ես դարի լավագույն ուսուցիչներն եմ ունեցել»: Գիտեք, մի անգամ ես նամակ գրեցի Իգոր Մարկևիչին: Այն շենքում, որտեղ ես ապրում էի, ապրում էր նաև մի կին, ով մտերիմ էր Մարկևիչի հետ, նա ասաց. «Արի, մի նամակ գրի, հետո կտեսնենք ինչ կլինի»: Եվ ես գրեցի, գրեցի, որ ես կոմպոզիտոր եմ, որ ուզում եմ սովորել նրա մոտ, և այլն, և այլն: Ընդամենը 3 օր անց նա պատասխանեց ինձ շատ ընկերական. «Եթե ուզում ես գալ, ահա սրանք իմ ազատ օրերն են, խնդրեմ»: Ես արագ գտա Փարիզ տանող գնացքն ու գնացի նրա մոտ: Նա ինձ շատ ջեմ ընդունեց: Ուզում եմ ասել, որ շատ կարևոր է ճիշտ մարդուն գտնելը: Կարլո Ջուլինիին, ով ինձ վրա դարձյալ շատ մեծ ազդեցություն ունի, ես հանդիպեցի Իսրայելում, երբ ընդամենը 19 տարեկան էի: Ես նրա մոտ էի գնացել իմ զարմիկի հետ, նա ինձ ներկայացրեց, և ես ասացի, որ դիրիժորություն եմ սովորում, նա ինձ այսպես վերևից նայեց ու հարցրեց՝ հիմա ի՞նչ ես պարապում: Ես ասացի՝ Հայդնի այսինչ սիմֆոնիան: Ասաց՝ լավ, վաղը նախաճաշին արի մենք կխոսենք այդ մասին: Ես այդ պահին ինձ դրախտում էի զգում, անչափ ոգևորված էի: Դրանից հետո ես նրա չտեսա 10-11 տարի: Եվ մի անգամ, երբ ես Փարիզում էի, պատահաբար աֆիշը տեսա և իմացա, որ Ջուլինին է այնտեղ, ես ներս մտա, նա բեմի վրա էր, երբ մոտեցա նրան, նա նայեց ինձ ու ասաց. «Հայդնի սիմֆոնիան»: Ես նրան անունս նորից պիտի ասեի, բայց սիմֆոնիան նա հիշել էր: Մեծ երջանկություն է նման ուսուցիչներ ունենալը, և շատ մեծ է նրանց ազդեցությունը: Թեև ժամանակի ընթացքում դու դուրս ես գալիս այդ ազդեցությունից: Այո, սկզբնական շրջանում դու կրկնօրինակում ես նրանց, բայց աստիճանաբար ինքնուրույն ես դառնում: Վստահաբար մի բան էլ կարող եմ ասել, երաժշտության հանդեպ իմ վերաբերմունքը գալիս է Ջուլինիից, որովհետև նրա համար երաժշտությունը սրբության պես էր, և նա ճիշտ էր:
Ինչպիսի՞ն են Ձեր և Ձեր ղեկավարած նվագախմբում աշխատող երաժիշտների հարաբերությունները:
Գերմանական նվագախմբում հարաբերությունները դիրիժորի և երաժիշտների շատ հստակ են դրված: Ես երբեմն նրանց հետ խոսելու ժամանակ և հնարավորություն էլ չեմ ունենում: Ես չեմ կարող նրանց հետ ընդմիջման գնալ, ոչ մի դեպքում: Ես նույն ավտոբուսով չեմ գնում, ինչ որ նրանք, այսպես է կարգը, այսպես են հարաբերությունները, սա չի նշանակում, որ դրանք վատ են, մենք շատ ընկերական ենք, շատ հարգալից, բայց այս տարածությունը միշտ կա, դա շատ պարզ է ու միաժամանակ շատ կարևոր: Բայց օրինակ մի բան էլ կա…. համերգից հետո նրանք գնում են միասին խմելու, նշելու, զվարճանալու, իսկ դու միայնակ նստած ես հյուրանոցի սենյակում (ծիծաղում է):  Պատահում է, որ երաժիշտներից մեկը մոտենում է քեզ, որ հարց տա, դու միանգամից ասում ես, որ ժամանակ չունես, որովհետև եթե թույլ տաս հարցեր տալ, կգա հաջորդը, հետո հաջորդը: Սա խաղի է նման, խաղ, որն անհրաժեշտ է այս հարաբերություններում: Երբեմն բռնապետություն է  հիշեցնում այս ամենը: Դիրիժորությունը աշխարհի միակ դրական, բարի բռնապետությունն է: Դու ասում ես ինչ անել և ինչ չանել, հիմնականում` ինչ չանել, իսկ նրանք սիրում են քեզ դրա համար (ծիծաղում է): Դիրիժորի գործը բարդ է մեկ այլ տեսնակյունից ևս, դու հսկայական կազմակերպչական աշխատանք ես կատարում: Եվ չնայած այս ամենին, եթե ես մի քիչ ազատ ժամանակ եմ ունենում, սարսափելի ձանձրանում եմ: Սա հետաքրքրիր աշխատանք է: Սա առաքելություն է, մարդկանց կյանքը ավելի լավը դարձնելու առաքելություն, չասենք լավ, ավելի ճիշտ, մի քիչ ավելի զգացմունքային դարձնելու առաքելություն:
Իսկ երբ Դուք, ասենք, հրավիրյալ դիրիժո՞ր եք:
Մի շատ կարևոր բան կա բոլոր պարագներում: Դու պիտի հավատաս այն ամենին, ինչ անում ես: Եվ երբ դու հավատում ես այն ամենին, ինչ անում ես, դու վարակում ես այդ հավատով մյուսներին: Սա հատկապես նվագախումբ-դիրիժոր հարաբերությունների մասին է: Ես չեմ փորձում բարի երևալ, սիրված լինել բոլորի կողմից: Ես պարզապես այնպիսին եմ, ինչպիսին կամ: Նվագախմբի բոլոր երաժիշտները գիտեն, որ ես երաժշտության մեջ ազնիվ եմ. սա բավական է, այլևս ոչինչ հարկավոր չէ: Երաժիշտները, որ բաց են, լսող, ինչպես, օրինակ, այստեղ`Հայաստանում, դա հասկանում են, և մենք արդյունավետ աշխատում ենք, բայց, օրինակ, երբեմն բարդ դեպքեր են լինում: Ասենք՝ սկանդինավյան երկրներում: Երբեմն ես ստիպված եմ լինում բարկանալ: Այդ պահերին մեկը հայտնվում է և ասում է` ինչու ես բարկանում, չէ՞ որ սա ընդամենը երաժշտություն է, և ես դրանից կատաղում եմ: Ինչպե՞ս թե ընդամենը երաժշտություն է:
Իսկ ինչպե՞ս է երաժիշտը հայտնվում Ձեր ղեկավարած նվագախմբում, ի՞նչ որակներ պետք է ունենա նա:
Օ~: դա էլ մեկ այլ պատմություն է: Ընտրում ենք: Հնարավոր է մի տեղի համար 25 թեկնածու լինի: Համարներ ենք տալիս նրանց, նվագում են, և ամեն համարից հետո թիվը կրճատվում է 25-ը դառնում դառնում է 10, 5 և այդպես: 15 ազգության երաժիտներ կան հիմա նվագախմբում: Պատկերացրեք` կան մարդիկ, որոնք անգամ գերմաներեն չեն խոսում: Ես կարծում եմ` ազնիվ է այսպես ընտրել երաժիշտներին, թեև պիտի ասեմ, որ երբեմն ընտրությունից հետո առաջին իսկ համերգի ժամանակ մենք հասկանում ենք, որ սխալ ընտրություն ենք արել, ու թեև երաժիտը գիտի իր գործը, բայց նվագախմբի հնչողությունից դուրս է: Պատահում է նաև այսպես:
Ինչպե՞ս եք ընդունում համերգների հրավերներըը, ի՞նչն եք հաշվի առնում շրջագայելիս:
Համերգները… Սա էլ  զուտ օրացույցային պատմություն է: Նախ գրանցում եմ Բեռլինի մեր համերգները, այնուհետև շրջագայությունները և եթե մնում են ազատ օրեր, հաշվի եմ առնում նաև այլ հրավերները: Այստեղ արդեն գործում է «ով առաջինը զանգեց, նա առաջին հյուրընկալողն է» սկզբունքը: Հերթով լրանում են օրացույցի ազատ օրերը: Ու հնարավոր է` որ այդ օրերը լրանան տարիներ առաջ: Օրինակ, երեկ մեզ զանգահարել էին Ալմա-Աթայից և ամրագրեցին օր 2017 թվականի ապրիլի համար: Ահա այսպես է տեղի ունենում այդ ամենը: Գրեթե երբեք չի պատահում դեպք, որ ասեմ` այստեղ ավելի շատ են վճարում, չեղյալ եմ համարում այն մյուս համերգը: Ոչ: Եթե համաձայնվել եմ, ուրեմն համաձայնվել եմ և ոչ մի բան չեմ փոխում: Ճանապարհորդությունները շատ են: Երբեմն դու կորցնում ես, իհարկե, բայց երբեմն էլ այնքան խենթ է այս ամենը: Օրինակ՝ գնում եմ Մեքսիկա մեկ շաբաթով, հետ եմ գալիս Բեռլին, 10 օր հետո դարձյալ թռնում եմ Մեքսիկա, հետո այնտեղից Ճապոնիա, Ճապոնիայից Լոնդոն և…այո, նորից հետ` Մեքսիկա (ծիծաղում է):
Դուք նաև  դասավանդում եք: Արվեստագետները, ովքեր դասավանդում են, երբեմն ասում են, որ դա սպառում է ստեղծագործող մարդուն, ինչպե՞ս է Ձեր դեպքում:
Այո, ես դասավանդում եմ, բայց ոչ համալսարանում, որովհետև ես չեմ հավատում համալասրանական կրթական համակարգին: Դիրիժորների համար նկատի ունեմ: Ես պարզապես վարպետության դասեր եմ տալիս մեկ շաբաթով նվագախմբի հետ: Ես ամեն տարի 4 վարպետության դաս եմ անցկացնում Բեռլինում և 3-4 դաս էլ Իտալիայում: Սա, իհարկե, շատ հոգնեցուցիչ է, բայց այստեղ շատ կարևոր մի բան կա. դասավանդելու մեթոդը: Օրինակ, երբեմն գալիս են դիրիժորները և ասում են` ես սովորեցնում եմ, ու սկսում են այնպես սովորեցնել, ինչպես դա համալսարանում են անում: Ես այս մեթոդը ատում եմ, և սա է պատճառը, որ երբեք համալասրան դաս տալու չեմ գնա: Դու դառնում ես ուսուցիչ, որ նաև դիրիժոր է, բայց դու պետք է լինես դիրիժոր, որ նաև դասավանդում է, շատ մեծ է տարբերությունը այս երկուսի: Ես սովորեցնում եմ ընդամենը իմ փորձը մարդկանց հետ կիսելու սկզբունքով: Սա մի գործընթաց է, երբ դու ինքդ սովորեցնելու ընթացքում սովորում ես: Սովորում ես արտահայտել այն ամենն, ինչ գիտես, որովհետև երբ դու աշխատում ես, դու երբեք ինքդ քեզ չես բացատրում, թե ինչպես ես անում, իսկ սովորեցնելու ընթացքում դու նաև բացատրում ես այդ ամենը և շատ բաներ հենց այս կերպ ես հասկանում:
Ի՞նչ կասեք երիտասարդների մասին: Ժամանակակից երիտասարդ կոմպոզիտորների և դիրիժորների հետ համագործություններին ինչպե՞ս եք վերաբերվում:
Խնդիրն այն է, որ այսօր երիտասարդ դիրիժորները հիմանականում ոչ թե երաժշտությամբ են տարված, այլ իրենց անձով ու կարիերայով: Այսպես է հարցը`  «ես այս գործը չափ կտամ, հետո ինչ կլինի` ինձ չի հետաքրքրում»: Եվ գիտե՞ք, այս մարդը, բացի այդ, նաև ցուցահանդեսների չի գնում, գիրք չի կարդում, արվեստը նրան չի հուզում, նա քաղաքականությամբ էլ չի հետաքրքրվում ու պատմությունն էլ նրան հետաքրքիր չէ, նա միայն շարժում է  դիրիժորական փայտիկը և վերջ, իսկ դա առանց վերը թվարկածների դատարկ է: Ես հիշում եմ, որ առաջին անգամ Ջուլինիի հետ Լոնդոնում էի, երեկոյան հրաժեշտ տալիս ասացի. «Դե լավ, մաեստրո, առավոտյան կտեսնվենք»: Նա շրջվեց և ասաց. «Ոչ, ոչ դու առավոտյան այստեղ չես գա: Կգնաս Բրիտանական թանգարան ու կնայես Սիենայի դպրոցի գեղանկարիչների գործերը, հետո մենք կխոսենք այդ մասին»: Ես այդ պահին իհարկե մտածում էի` ինչու է նա ինձ այնտեղ ուղարկում, բայց երբ երեկոյան մենք զրուցում էինք, նա ինձ այնպիսի հարցեր էր տալիս… պարզ էր, որ նա այնտեղ յուրաքանչյուր նկարի մասին գիտի ամենայն մանրամասնությամբ: Հարցրեցի. «Մաեստրո, ե՞րբ եք այնտեղ եղել»: Նա ասաց. «Երկու շաբաթ առաջ, չորս շաբաթ առաջ, վեց շաբաթ առաջ. ես այնտեղ գնում եմ ամեն անգամ, երբ Լոնդոն եմ գալիս»: Ինձ համար դա ինչ-որ նոր բան էր:
Հիմա դիրիժորների մոտ երկու խնդիր կա: Կան երիտասարդ դիրիժորներ, ովքեր, թվում է, հրաշալի են, տաղանդավոր, երկու տարի ամեն տեղ երևում են և հանկարծ մի ակնթարթում անհետանում են, որովհետև չունեն հենվելու տեղ, իսկ դա ի՞նչն է… նվիրումը, կիրքը:
 Մյուս խնդիրն այն է, որ մեր ժամանակներում բոլորը դիրիժոր են: Ով երբևէ դիպել է  այդ փայտիկին, իրեն դիրիժոր է երևակայում: Մարդիկ չեն ուզում հասակնալ, որ սա լուրջ մասնագիտություն է, որին տիրապետելու համար դու տարիներ շարունակ պիտի սովորես: Կարո՞ղ եք պատկերացնել՝ ի՞նչ կլինի, եթե հիվանդանոցի բոլոր բուժքույրերը որոշեն, որ իրենք բժիշկներից շատ բան գիտեն ու կարող են անել նրանց գործը: Նույն իրավիճակն է: Ես ձեզ օրինակ էլ կարող եմ բերել:  Իցհակ Պերլմանը, գիտեք, աշխարհի լավագույն ջութակահարներից մեկն է, բայց մի անգամ նա որոշել էր չափ տալ: Ղեկավարել էր Չայկովսկու 5-րդ սիմֆոնիան: Մարդիկ դուրս էին եկել և ասում էին, որ դա ահավոր էր: Ու բոլորը իրար հարցնում էին` ինչպե՞ս կարող է այդ վարպետությունն ու երաժշտական զգացողություն ունեցող ջութակահարն այդքան ոչ երաժշտական լինել, երբ դիրիժորական վահանակի մոտ է: Բայց ինչո՞ւ չզբաղվել մասնագիտությամբ, որը դու կարողանում ես: Սա է այսօրվա ամենամեծ խնդիրներից մեկը: Սա համաճարակ է:
Իսկ ի՞նչ կասեք կոմպոզիտորների մասին:
Իհարկե, նույնքան բան չեմ կարող ասել, ինչ դիրիժորների մասին, որովհետև նախևառաջ այդքան տեղեկություն չունեմ, բայց հստակ մի բան կա. հիմա մենք կոմպոզիտորական ճգնաժամի մեջ ենք, և ես առաջիկայի համար լավատես չեմ, որովհետև եվրոպական մշակույթը, այդ թվում նաև երաժշտությունը, հասավ պիկի ու սկսեց անկում ապրել, ճիշտ Հռոմեկական կայսրության պես, կա շատ բան, և մեկ էլ ամեն ինչ ներքև է գլորվում: Ինչո՞ւ: Ոչ ոք չգիտի ինչու: Փաստ է, որ այն մակարդակը չէ, ինչ պիտի լիներ:
 Լավ օրինակներ չկա՞ն:
Դուք նկատի ուենք, որ ես անուննե՞ր ասեմ: Դա ահավոր պատասխան կլինի: Օտտո Կլեմպերին ես կյանքում մի անգամ եմ հանդիպել, բայց միշտ հիացել եմ նրանով: Ուրեմն  նա  շատ չէր սիրում խոսել, ու երբ նրան ձեր այս հարցի պես մի հարց էին տալիս ասում էր. «Ես խոսում եմ միայն մահացած կոլեգաներիս մասին» (ծիծաղում է): Ինչևէ: Իհարկե, ես ունեմ լավ ուսանողներ: Բայց դարձյալ չեմ տեսնում նվիրում: Վերցնում են սիմֆոնիան, ասում են` լավ, մաեստրո, երկու շաբաթից կգամ, ասում եմ` ոչ, երկու շաբաթից դու պատրաստ չես լինի, քեզ երեք ամիս է պետք: Կան նաև ուսանողներ, որ ասում են` մաեստրո ես 4 տարի սովորեցի Ձեզ մոտ, հիմա ի՞նչ եմ անելու:  Բայց սա իմանալը իմ պարտականությունը չէ: Ես չեմ կարող այստեղ օգնել նրանց: Ինչպե՞ս օգնեմ: Ես չեմ կարող նրանց հրավիրել Բեռլինի նվագախմբում աշխատելու, որովհետև այտեղի երաժիշները նրանց պարզապես կուլ կտան: Այո, մի զարմացեք, այնտեղ ձեր երաժիշտների պես բարի չեն, նրանք շատ ագրեսիվ են: Բեռլինում նրանց տաքսի կնստեցնենք և կճանապարհեն օդանավակայան: Ես չեմ կարող հրավիրել ցանկացածին: Այդ պատճառով ես նրանց բոլորին մի խորհուրդ եմ տալիս` ստեղծեք ձեր սեփական նվագախմբերը:  Փոքրից պետք է սկսել հետո աշխատել ու աճել: Թեև պետք է ասել, որ նվագախմբերի  վիճակն էլ այսօր նախանձելի չէ, Գերմանիայում, օրինակ, երկրի միավորումից հետո մինչ օրս 40-45 նվագախումբ է փակվել: Իմ նվագախմբի բյուջեն այս տարի մեկ քառորդով կրճատվել է: Երաժիշտներն ամեն օր այս մասին են խոսում: «Մաեստրո, հանկարծ չթողնեք մեզ, որովհետև եթե Դուք գնաք, նրանք կփակեն նվագախումբը»: Սա է իրավիճակը: Եթե ես թողնեի այս նվագախումբը 5 տարի առաջ, այն ևս արդեն գոյություն չէր ունենա:
Աշխարհը շատ արագ է փոփոխվում, արդեն կայացած նվագախմբի ու նրա ղեկավարի համար ի՞նչ դժվարություններ են ի հայտ գալիս, դժվար չէ՞ պահպանել ստեղծված հեղինակությունը:
Եկեք ես էլ ձեզ մեկ այլ հարց տամ. Բեռլինի բնակչության քանի՞ տոկոսն է դասական երաժտության համերգների գնում: Գիտե՞ք: Երկու տոկոսը: Քանի՞ տոկոսն է գնում թանգարաններ: Զբոսարշրջիկներին չենք հաշվում: Ոչ ավելի, քան մեկ տոկոսը: Նման պարագայում ոչ մի հեղինակության մասին խոսք լինել չի կարող: Կներեք, այսքան բացասական բաներ ասելու համար, բայց դա այդպես է: Ձեր պատկերացրած մշակութային Եվրոպան այնքան էլ այդպիսին չէ: Գիտե՞ք՝ ես վերջերս Իտալիայում ինչի ականատես եղա:  Օդանավակայանի անցակետի աշխատակցուհին,  տեսնելով դիրիժորական փայտիկը, ասում է` սա ի՞նչ է: Հարցնում եմ` իսկ Ձեր կարծիքով ի՞նչ է: Ասում է` դե երևի այն փայտիկներից, որով ուտում են չինացիները: Եվ սա ամենաերաժշտական երկրներից մեկում: Վերջ:
Մենք այդպես չէինք կարծում:
Ի՞նչ եք կարծում, ձեր երկրում դասական համերգի գնացող 40 հազար մարդ կա՞: Կածում եմ` կա: Դա ձեր երկրի համար նույն երկու տոկոսն է: Նույնն է: Նույն իրավիճակն է, ինչ Եվրոպայում: Ես տեսնում եմ՝ դուք չեք ուզում հավատալ: Ես ձեզ մեկ այլ բան էլ կպատմեմ: Այս անգամ Իսպանիայում պատահեց դեպքը: Ես Մադրիդի սուրճի խանութներից մեկում հանդիպեցի մի երիտասարդ պոետի, ով այնտեղ բավականին ճանաչված է: Այս աղջկան համերգի հրավիրեցի: Գիտե՞ք՝ ինչ ասաց նա: Որ առաջին անգամ է դասական համերգի գնում: Նա այնպես էր ցնցված, որ իր սիրային բանաստեղծությունների գիրքը ինձ նվիրեց: Սա էլ ինտելեկտուալ մարդկանց մասին: Եղել են դեպքեր, երբ արվեստագետի, նկարչի համերգ եմ հրավիրել, իսկ նա հիացած դեմքով ասել է` ինչ լավ կլինի, ես վերջապես կտեսնեմ ֆիլհարմոնիկը: Գերմանացիները այսպիսի մարդկանց ասում են Fachidiot` պրոֆեսիոնալ ապուշ:
Նույն իրավիճակն է նաև երաժիշտների մոտ: Միմյանց ներկայացնելիս ասում են` սա բարոկկո երաժշտության մասնագետ է, սա` կլասիկ, սա մոռեդն երաժշտության մասնագետ է: Ի՞նչ է սա նշանակում: Դու կամ երաժիշտ ես, կամ երաժիշտ չես: Գիտեք, սա նաև երաժշտության հանդեպ վերաբերմունքի խնդիր է: Շատ երաժիշտներ, հատկապես երիտասարդ գալիս են և մեկնաբանում են երաժշտությունը: Ես ատում եմ այս բառը՝ ինտերպրետացիա: Ես իմ ուսանողներին գիտեք ի՞նչ եմ ասում: Մեկնաբանությունը այն է, երբ ի վիճակի չես կատարել այն, ինչ գրված է: Ինչ գրված է, արդեն լավ է: Նվագիր՝ ինչ գրված է և վերջ: Եթե դու դա անես, արդեն հրաշալի է: Այդ բառը հնարել են, որ գործը փչացնելը լեգալացնեն: Պետք է թարգմանել` ինչ գրված է՝ կյանքի կոչելով երաժշտությունը: Երաժշտությունը ֆենոմենալ երևույթ է, այն գոյություն չունի ժամանակի մեջ, այն հնչում և ավարտվում է, հայտնվում է և նույն պահին անհետանում: Մի՞թե այսքանը արդեն հրաշալի չէ:
Դուք առիթ ունեցել եք մի քանի անգամ աշխատել հայ երաժիշտների հետ, ի՞նչ կարծիք ունեք, սիրո՞ւմ եք աշխատել նրանց հետ:
Ինչո՞ւ եմ ես Հայաստան գալիս: Ինձ հաճախ են այս հարցը տալիս: Ասում եմ՝ որովհետև սիրում եմ նվագախումբը: Ասում են` իսկ վարձատրությո՞ւնը: Ես պատասխանում եմ` ոչինչ, դա խնդիր չէ: Ես տեսնում եմ որակ: Հատկապես լարայինները հիանալի են: Փորձի ժամանակ հարցրեցի երաժիշտներից մեկին, թե որտե՞ղ է սովորել: Ասաց` այստեղի կոնսերվատորիայում: Իսկապես հաճելիորեն զարմացած եմ: Նշանակում է` ամեն ինչ լավ է: Նաև աճ եմ տեսնում: Ես համեմատում եմ նախորդ այցերիս հետ, որակական զգալի աճ կա:  Միայն թե այստեղ գործիքների խնդիր կա: Որակյալ գործիքներ ունենալը շատ կարևոր է: Ձեր երաժիշտներից շատերը նվագում են հին գործիքներով: Գիտեք, գործիքը մաշվեց, վերջ, հնչողությունն այն չէ, և դա ազդում է որակի վրա: Ինչևէ, դուք հպարտ պետք է լինենք, որ նման նվագախումբ ունեք, մարդիկ շատ դրական են, լավ են նվագում, ինձ դուր է գալիս:
Զրույցը` Մերի Դոլմազյանի և Աստղիկ Հակոբյանի
VN:F [1.9.20_1166]
Rating: 5.0/5 (1 vote cast)
VN:F [1.9.20_1166]
Rating: +1 (from 1 vote)

spacer

Բեռլին սիմֆոնիկի գլխավոր դիրիժոր Լիոր Շամբադալը Երևանում է

February 25th, 2016
by
under Հայերեն հոդվածներ.
No Comments.

Հայաստանի ազգային ֆիլհարմոնիկ նվագախմբի (գեղարվեստական ղեկավար՝ Էդ. Թոփչյան) հրավերով երրորդ անգամ Երեւան է ժամանել հրեա ճանաչված արվեստագետ, Բեռլին սիմֆոնիկի գլխավոր դիրիժոր Լիոր Շամբադալը: Նախորդ երկու այցերի ժամանակ մաեստրոն առաջին անգամ հայ հանդիսատեսին ներկայացրեց հրեա կոմպոզիտոր Աննա Սիգալին: Ֆիլհարմոնիկի մեկնաբանմամբ հնչեցին կոմպոզիտորի «Հոգու երգերը»՝ ըստ Սայաթ-Նովայի եւ «Կոլաժ՝ Սերգեյ Փարաջանովին» ստեղծագործությունը՝ գրված սիմֆոնիկ նվագախմբի եւ ասմունքողի համար: Վերջին երկը դիրիժորն ու կոմպոզիտորը նվիրել էին Սերգեյ Փարաջանովի 90-ամյա հոբելյանին: Այդ երեկո, որը կայացավ 2014 թ. ապրիլի 24-ին, մաեստրո Շամբադալը, Հայոց եղեռնի 99-ամյա տարելիցի առիթով, հայերենով խոսք ուղղեց հանդիսատեսին: Արդյունքում տարածվեց կարծիք, թե հրեա արվեստագետը հավանաբար հայկական արմատներ ունի: «Առավոտի» հետ հանդիպման ժամանակ դիրիժորը հերքեց իր հայկական արմատների մասին խոսակցությունները, նշեց, որ հատուկ պարապել էր խոսքը հայերեն ճիշտ հնչողությամբ արտաբերելու համար: Նա հավելեց, որ իր եւ տարբեր նվագախմբերի հետ մինչ օրս ներկայացրել է Խաչատրյանի ստեղծագործությունները: Ինչ վերաբերում է իր հայրենակցուհու երկերին՝ նվիրված Սայաթ-Նովային եւ Փարաջանովին, հավաստիացրեց, որ առաջիկայում դրանք կհնչեն Բեռլին սիմֆոնիկի կատարմամբ: Դիտարկմանը՝ Շամբադալ երաժիշտը ստեղծագործական ուղու սկզբում հայտ է ներկայացրել իբրեւ կոմպոզիտոր, ապա դադարեցրել, մեր զրուցակիցը հայտնեց. «Տարիներ առաջ դադարեցրել եմ կոմպոզիտորական գործունեությունս: Դա 1980 թվականն էր, երբ 30 տարեկան էի, եւ կյանքից հեռացավ հայրս, որն իմ միակ ոգեշնչողն էր: Հետո ներսս դատարկություն էր… Դա տեւեց շա՜տ երկար: Վերջերս, ավելի ճիշտ՝ երեք տարի առաջ Իսրայելի մշակույթի նախարարությունից կամերային ստեղծագործության պատվեր ստացա՝ մեծ հոնորարով: Այդ ժամանակահատվածում մտածեցի՝ Վերդիի, Ռոսինիի օրինակով, որոնք տարիներով դադարեցրել են ստեղծագործական պրոցեսը, հետո լծվել աշխատանքի, գուցե ինձ է՞լ էր նման ճակատագիր սպասվում: Պարզվեց՝ ոչ: Այստեղ մեղավորը միայն ժամանակն էր: Բեռլին ֆիլհարմոնիկի դիրիժոր լինելուց բացի, ես համերգներ եմ ղեկավարում մայրցամաքներում, իրականացնում այլ նախագծեր, օպերային բեմադրություններ…»: Կեսկատակ-կեսլուրջ հարցրինք՝ եթե գա մի ժամանակ, որ ինչ-ինչ պատճառներով պաշտոնազրկվի, դա իր համար ողբերգությո՞ւն կլինի: Մաեստրոն պատասխանեց. «Մոտ 20 տարի Բեռլին սիմֆոնիկի գլխավոր դիրիժորն եմ: Կարծում եմ, որ այդ պաշտոնի համար սա երկար ժամանակ է: Բայց ոչ մի բան հավերժական չէ: Միանշանակ, ողբերգություն չեմ ապրի, ավելին՝ ողբերգություն չեմ ապրի, եթե նույնիսկ իբրեւ դիրիժոր էլ հանդես չգամ: Ինձ հիմա ավելի շատ է ձգում մանկավարժությունը, բազմաթիվ հրավերներ ունեմ վարպետության դասերի, որոնց սիրով եմ արձագանքում»: Ինչ վերաբերում է «օպերային» գործունեությանը, Լիոր Շամբադալն ասաց. «1993-2000թթ. հանդիսացել եմ նաեւ Գերմանիայի Կայզերսլաուտերնի երաժշտական ղեկավարը, վարել եմ շուրջ 600 ներկայացում: Իրականացրել եմ Գլինկայի «Կյանքը ցարի համար», Ռիմսկի-Կորսակովի «Մոցարտ եւ Սալիերի» օպերաների բեմականացումները, Ռուսաստանի, Գերմանիայի, Իտալիայի, Ֆրանսիայի տարբեր օպերային թատրոններում հանդիսացել եմ ավելի քան 40 օպերաների բեմադրող դիրիժորը: Ի դեպ, Երեւանի օպերային թատրոնից եւ կոնսերվատորիայից հրավերի դեպքում էլ պատրաստ եմ օգտակար լինել…»:

Ամբողջական հոդվածը կարող եք կարդալ այս հասցեով՝ http://www.aravot.am/2016/02/25/660641/

© 1998 – 2016 Առավոտ – Լուրեր Հայաստանից

VN:F [1.9.20_1166]
Rating: 5.0/5 (1 vote cast)
VN:F [1.9.20_1166]
Rating: 0 (from 0 votes)

spacer